Iha loron 29 outubro 2025, Sua Eminência Dom Virgílio Cardeal do Carmo da Silva, SDB fo benção ba edifício Sala de Conferência e Residência iha Comando, suco Dare, Posto Administrativo Vera Cruz, Municipio de Dili. Cerimónia inauguração ida ne’e marca mos presença hosi Coordenador do Gabinete de Apoio á Sociedade Civil (GASC), Sr. Eng. Joaquim da Costa Freitas hamutuk ho membro equipa comitiva. “Uma ida ne’e sei sai nu’udar centro formação ida, nune’e, precisa nafatin atu atividade formação nian hala’o contínua iha fatin ida ne’e.”, tenik Coodenador GASC iha biban wainhira hato’o ninia discurso. Entretanto, Rev. Pe. Augusto do Carmo Martins, Presidente do Conselho Administrativo Fundação São Paulo hato’o katak ho graça Maromak nian, ita iha tan uma foun ida hodi sai nu’udar fatin formação iha Comando, tamba Fundação São Paulo hamutuk ho ONG RAEBIA Timor-Leste iha ona experiência implementa atividade formação konaba conservação ba rai no bée, Dare Eco-Farm, no Dare-Eco Tourism iha âmbito projeto Reflorestação de Dare financia hosi União Europeia iha Timor-Leste hosi tinan 2019-2022. Experiência hirak ne’e sai nu’udar buka’e ida hodi loke fatin centro formção ida iha Comando, Dare. Ao passo que, Sua Eminência Dom Virgílio Cardeal do Carmo da Silva, SDB iha ninia discurso hodi naran Arquidiocese Dili nian hato’o agradecimento wain ba IX Governo Constitucional nebe mak la falta atu fo nafatin apoio ba Uma Kreda Timor liliu ba Arquidiocese de Dili liu hosi contrução obra ida ne’e. Entretanto, título obra ida ne’e ho naran “Nova Construção da Sala de Conferência e Residência, ho número referência: 01/FSP/CD/IX/2023, executa hosi contractor Bonavide Unipessoal Lda ho montante USD 310,730.41. Sua Eminência Dom Virgílio Cardeal fo hili naran ba uma ida ne’e nu’udar Centro de Formação São Carlo Acutis. Nu’udar fatin centro formação ida, nune’e, uma ida ne’e ba dala uluk nu’udar laboratório ba Estudante Universidade Católica Timorense (UCT) hofi Faculdade Agrícola – Escola da Agrotecnologia, iha nebe estudante sira wainhira hetan bíban hodi mai halo pratica campo Comando, fatin ida ne’e sei halibur sira hodi simu instrução hosi docente sira molok tun ba campo. Nune’e mos fatin ida ne’e nu’udar formação ba comunidade sira konaba técnica agrícola sustentável, no, sai mos espaço diak ida hodi halo reunião, workshop, retiro, nst.
Iha cerimónia inauguração ida ne’e marca mos presença hosi Magnífico Reitor UCT, Frei Doutor Joel Casimiro OFM, Amu Reitor SENOFA no Presidente UNIO Arquidiocese Dili, Pe. Natalino da Costa Soares, Amu Reitor SPEPAL, Pe. Miguel Arcanho da Costa, Amu Pároco de Dare, Pe. Domingos Bian, Amu Diretor Nacional da Comissao Justica e Paz da Integridade e Criacao (JPIC), Pe. Demetrio da Conceicao Xavier, amu sira seluk tan, irmã sira hosi comunidade SJMJ Dare, equipa Comissão Técnica Diocesana (CTD) Arquidiocese Dili, Diretora Interina Faculdade de Engenharia Agricola UCT
Director empresas Galvalindo no Rachio, autoridade local no lian nain, no polícia comunitária suco Dare.
Evento simples ida ne’e hetan animação dança tradicional hosi foin sa’e feto no mane aldeia Fila Bé Ba Tua, no mos, música pop hosi grup banda local suco Dare.
