Ohin, Sexta-feira, 21 Novembro 2025, realiza assinatura acordo arrendamento rai Arquidiocese nian hamutuk ho investor local no internacional. Parte sira mak assina acordo ne’e, representante hosi Arquidiocese Dili mak Reverendo Pe. Juvito Rêgo de Jesus Araújo, no, parte investor sira mak hanesan hosi Fortuna Star Lda, Sr.Siu Peng Lay, no, hosi Internaitonal HE FU Construciton Unipessoal Lda, Sr. Tan Changji. Objetivo hosi acordo arrendamento rai mak hanesan hosi parte rai nain, Arquidiocese Dili arrenda rai ba investor sira hodi desenvolve business center/centro de negócio ida liuliu ba desenvovimento economia iha Timor-Leste. Business Center ida ne’e mos sei introduz ba ema estrangeiro ka businesman sira seluk hodi mai investe iha Timor, no, bele sai mos nu’udar marketing turístico ida hodi atrai visitor sira hakat mai iha Timor-Leste.
Iha intervenção Dom Virgílio Cardeal do Carmo da Silva, SDB hateten katak ho acordo ida arrendamento ida ne’e bele aproveita mos espaço oan ruma nebe mak Arquidiocese Dili iha hodi hadia diak liu economia iha rai rai laran.
Entretanto, hosi parte investor sira, representa hosi Sr. Siu Pen Lay, hato’o agredece wain ba Arquidiocese Dili, nebe mak loke odamatan ba investimeno iha espaço nebe considera potencial iha Dili laran ne’e. Rai nebe mak atu arrenda ho medida 5,500m2/0.55 héctares localizada iha Câmara Antiga, Bidau Lecidere, Dili. Sasin sira ba iha acordo arrendamento rai ne’e mak hanesan Reverendo Pe. Augusto C. Martins hosi Fundação São Paulo, Reverendo Pe. Ivo Martins Hí da Silva – Ecónomo Arquidiocese de Dili, Reverendo Pe. Ângelo Salsinha – Presidente da Associação Turismo Religioso Timor-Leste (ATR- TL), Sra. Manuela Barros S. Guterres-Fortuna Star, no, Sra. Son Mee Ling-International HE FU Unipessoal, Lda. Duração ba acordo arrendamento ida ne’e sei lori tinan limanulu (50) sura hosi data assinatura ba iha loron ida ohin.
