Cada tinan sempre iha atividade colheita batar iha Área Demonstração To’os Foho Lólon Permanente, Dare. Área Demontração, eh, Demo Plot ida ne’e sei utiliza nafatin hosi caretaker FSPDD nian nebé mak durante ne’e tau matan hela ba área refere hodi continua hala’o nafatin atividade prática agricultura sustentável wainhira sira tuir ona formação konaba técnica ida ne’e iha âmbito projeto “Reflorestação de Dare” financia hosi União Europeia iha Timor-Leste. Maski projeto refere remata ona iha janeiro 2022, maibé conhecimento nebé mak to’os nain sira aprende ona sei continua aplica iha ida-idak ninia quintal, inclui iha Área Demonstração To’os Foho Lólon Permanente.

Ohin, 25 março 2024, equipa Fundação São Paulo inclui caretaker hosi Fatunaba, Comando-Dare no funcionário Centro Retiro de Dare (CRD) hala’o atividade colheita batar iha Área Demonstração To’os Foho Lólon Permanente.  Atividade ida hahú hosi silu batar, halo seleção ba batar fini di’ak no batar a’at, hafoin tétu hodi hatene quantidade hodi fini batar hirak ne’e rasik. Qualidade batar nebé mak ohin halo ona colheita ne’e fahe ba iha parte tolu, mak hanesan: 1). Batar fini di’ak liu hamutuk 214 kg, 2) Batar fini di’ak hamutuk 99,50 Kg, no, batar fini la di’ak/aat hamutuk 47 Kg. Ho nune’e, resultado ba colheita batar ba iha loron ida ohin iha Área Demonstração To’os Foho Lólon Permanente, hamutuk 360,50 Kg.

Batar fini hirak nebé mak di’ak liu ne’e, sei iha processo habai to’o maran, no, liu tiha fase ida ne’e, caretaker iha Área Demonstração ida ne’e, sei halo fali seleção, no, tétu fila fali hodi hatene ninia resultado final. Fini hosi batar hirak ne’e, sei distribui ba membro grupo to’os nain sira nebé mak uluk participa ona iha atividade formação konaba técnica agricultura sustentável iha âmbito projeto “Reflorestação de Dare” atu ida-idak lori ba kuda iha ida-idak ninia quintal.