Liafuan hirak ne’e hato’o hosi Dom Virgílio Cardeal do Carmo da Silva, SDB, iha cerimónia lançamento ba Primeira Pedra ba obra drenagem iha Maloa, Ailok Laran Dili iha loron Quinta-feira, 11 abril 2024, tuku 10h00 OTL. Obra construção ida ne’e rasik ho título: “Water Collector Tank, Water Channel, and One Bridge” (Tt. Tanque halibur bée, bée dalan, no harí ponte ida) nebé executa hosi Bonavide Unipessoal Lda nu’udar  empreteiro ba projeto ida ne’e. Items principal sira ba projeto ida ne’e mak hanesan Concreto magro, Concreto armado, Aço de classe 40, no Alvenaria de pedra, etc ho distância bée dalan hamutuk 2,016 metros. Obra ida ne’e rasik sei hetan controlo direita hosi consultor construção civil Mr.Ayub (Yoseph) ho ninia equipa hosi Absharan Engineering Construction and Consultancy, Unipessoal, Lda. Valor contratual ba obra ida ne’e ho montante USD 434,069.66 ho ninia duração ba execução obra iha fulan 9 (sia) nia laran.

Entretanto, molok hakat to’o mai iha fase hatúr fatuk-inan ba obra ida ne’e, processo ba obra ida ne’e rasik hahú ho loke concurso iha dia 21 fevereiro 2024 liu hosi jornal Timor Post, hafoin fase submissão proposta, no avaliação proposta concorente sira nian hosi equipa Comissão Técnica Diocesana (CTD) Arquidiocese Dili hamutuk ho consultor hosi Absharan Engineering Construction and Consultancy, Unipessoal, Lda.

“Obra drenagem ida ne’e sei fo apoio tomak ba obra sira tuir mai iha terreno Maloa nian iha futuro”, tenik Dom Virgílio Cardeal do Carmo da Silva, SDB wainhira hato’o lia menon ba empreteiro no ninia equipa sira atu hala’o serviço ida ne’e ho qualidade. Obra sira iha futuro nebé atu hahú dadaun ona mak Clínica São Vicente Díli, nebé mak ninia lançamento iha loron 23 abril 2024. Obra clínica ida ne’e sei gere direita hosi Madre Congregação São Vicente de Paulo.

Iha cerimónia lançamento fatuk-inan ba obra drenagem ida ne’e marca mos presença hosi autoridade local suco Bairro-Pite nian mak hanesan Chefe de Aldeia Timor Kmanek, no, Chefe de Aldeia Buka Fini. Cermónia ida ne’e remata ho “Um copo de água” iha terreno, Maloa.