Universidade Católica Timorense (UCT), liu hosi Fundaçao São Paulo Arquidiocese de Díli celebra Contrato de Cooperação ho investidor hosi Índia, Indomed Educare Pvt Ltd iha campus UCT, iha loron Terça-feira, 23 abril 2024. Investidor ne’e rasik iha interesse hodi promove educação médica credenciada internacionalmente ho hakarak hadia infreaestrutura no capacidade instituição nebé mak oras ne’e iha dadaun. Atividade cooperação ida ne’e sei realiza iha campus UCT hahu iha fulan setembro 2024. Parte rua, tanto UCT ho Indomed Educare, sei realiza curso MBBS (Bachelor of Surgery & Bachelor of Medicine – Bacharelado iha Cirurgia no Bacharelado iha Medicina) hodi proporciona educação médica ho alta qualidade iha nebé hatúr iha valor católico nian, hodi prepara estudante sira atu hakat ba hasouro exigência sira saúde nian, tanto iha nível nacional, no mos, internacional.
“UCT ninia existência liu hosi ninia Faculdade Medicina, la’os atu halo competição ho universidade hirak nebé mak agora existe iha Timor iha área medicina nian, maibé atu ofereçe qualidade ida diferente hosi aspeto saúde nian iha curso hirak nebé mak existe iha UCT ba sociedade timor”, dehan Dom Virgílio Cardeal do Carmo da Silva, SDB iha ninia discurso iha evento kmanek ida ne’e. Frei Dr. Joel Casimiro, OFM, Reitor UCT nian, aproveita mos ocasião kmanek ida ne’e hodi hato’o agradecimento wain ba cooperação ida ne’e, no mos ba confiança nebé mak investe ba UCT atu gere programa cooperação ida ne’e hodi la’o ho didiak.
Tuir programa nebé mak iha, parte rua UCT no Indomed Educare sei desenvolve currículo ida próprio ba curso MBBS nian, iha nebé bele aplica ba estudante sira tanto iha nível nacional no mos internacional. Ho nune’e, organização sira mak hanesan WHO, IMED, FAIMER, NMC no mos responsável sira seluk iha educação área saúde nian hosi nação/organização/agência sira seluk sei mos tulun parte rua ne’e hodi realiza didiak programa curso MBBS ida ne’e. Iha fulan setembro 2024, Indome Educare sei haruka estudante grupo dahuluk ho total 300 pessoas hosi nação sira seluk atu mai tuir curso MBBS hamutuk ho estudante medicina iha UCT. Duração ba contrato ida ne’e sei lori to’o tinan 50 (limanulu), iha nebé cada tinan académico, estudante sira sei frequenta curso MBBS ida ne’e, tanto iha rai laran, no mos, iha rai liur.
Marca mos presença iha cerimónia oficial ida ne’e, Vice-Primeiro-Ministro, Ministro Coordenador dos Assuntos Sociais e Ministro do Desenvolvimento Rural e Habitação Comunitária, Mariano Assanami Sabino, Ministro do Ensino Superior, Ciência e Cultura, Dr. Jose Honório da C. P. Jerónimo, Diretor ANAAA, Dr. Nilton Diamantino Paiva, hamutuk ho convidado sira hosi Delegação Indomed Educare, convidado sira seluk, inclui mos Decano no Diretor sira hosi curso sira nebé existe iha UCT.
Cerimónia ida ne’e remata ho oferecimento produto café robusta no aifuan hosi plantação Comando-Dare, hosi equipa Fundação São Paulo ba convidado honrado sira no participante sira seluk iha evento ida ne’e.
