Ohin, 5 dezembro 2020, iha tuku 10h30 OTL, Arcebispo Dom Virgílio do Carmo da Silva, SDB celebra missa hamutuk ho amululik com celebrante sira hosi Vigararia Forânea Aileu, no, sarani tomak hosi paróquia Dare nian hodi comemora festa padroeira São Franciso Xavier, mahein paróquia Dare. Durante celebração Eucarísitca ida ne’e, Arcebispo mos fo Sacramento Crisma ba crismado hamutuk ema nain 12 (sanulu resin rua). Atividade seluk iha âmbito celebração festa padroeira ida ne’e, Amu Pároco de Dare, Pe. Abril Lopes ho sarani sira organiza atividade feira ba produto local, no mos atividade seluk-seluk tan hahu hosi loron 01-05 dezembro, 2020 iha campo footsal paróquia Dare. Iha biban ida ne’e, estudante sira hosi Fundação São Paulo nebé mak tuir ona formação Gastronomia Básica iha PRO EMA, hetan mos convite atu halo promoção konaba produto sira mak hanesan: pão halo hosi lakeru, talas no fehuk midar, no, bolinhos halo hosi kajú hodi promove iha feira, paróquia Dare. Nune’e, liu tiha celebração Eucarística, Arcebispo Dom Virgílio do Carmo da Silva, SDB hakat ba visita tenda ida-idak iha feira, inclui mos tenda nebe mak estudante Fundação São Paulo promove hela produto sira nebé mak hanesan temi ona iha leten. Arcebispo Dom Virgílio acompanha hosi amu pároco de Dare, Pe. Abril Lopes, no mos amululik sira seluk, experimenta direita produto pão no bolinhos nebe mak produz hosi estudante Fundação São Paulo. Estudante sira senti haksolok tamba Arcebispo Dom Virgílio ho amululik sira bele conhece diak liu tan resultado hosi produto nebe mak estudante sira rasik mak produz no promove iha Dare, liuliu iha âmbito projeto “Reflorestação de Dare”, Financia hosi União Europeia.

Iha loron 21 – 22 Novembro, Fundação Oriente organiza evento Mercado de Natal (Christmas Market 2020) hodi comemora festa natal ba tinan 2020. Fundação São Paulo Diocese Dili (FSPDD) hetan mos biban hodi participa iha evento ida ne’e. Formando sira nebé mak durante ne’e tuir hela formação gastronomia básica no atendimento iha PRO EMA, experimenta halo rasik pão hosi lakeru, fehuk midar no talas hodi fan iha evento Mercado de Natal durante loron rua, sábado no domingo (21-22 novembro) husi tuku 15h00 to’o 20h00 iha fatin exposição Fundação Oriente. Produto seluk nebe mak promove mos iha Merado de Natal mak café moca, café robusta no cravinho (cengkeh) mai plantação Dare, iha área intervenção projeto “Reflorestação de Dare”, financia hosi União Europeia iha Timor Leste.