Formado 37 (Mane:12 / Feto: 25) nebé tuir ona Formação iha East Timor Development Agency (ETDA) no PRO EMA durante fulan 4 (haat) iha área Turismo, Hospitalidade & Gastronomia simu certificado hosi Embaixador União Europeia iha Timor Leste, Sr. Andrew Jacobs, Arcebispo Metropolitá de Dili, Dom Virgílio do Carmo da Silva, SDB no Vice-Ministra do Turismo Comunitário e Cultural, Sra. Inácia da Conceição Teixeira iha Sala de Conferência – Centro Retiro de Dare. Durante período formção iha área Turismo ida ne’e, participante sira ne’e fahe ba grupo rua: Grupo ida ho total 21 pessoas (mane: 10 / feto: 11) tuir formação kona ba Turismo no Hospitalidade durante loron 40 (10 agosto-02 outubro, 2020) iha East Timor Development Agency (ETDA), nune’e mos, grupo ida seluk composto hosi 16 pessoas (feto: 15 / mane: 1) tuir formação Gastronomia Básica & Atendimento iha PRO EMA durante 90 dias (04 agosto-30 novembro). Grupo ida uluk nebe mak tuir tiha formação Turismo no Hospitalidade iha ETDA, continua tuir formação kona ba Higiene, gastronomia no serviço atendimento iha PRO EMA durante 50 dias (04 outubro – 04 dezembro). Iha discurso Sr. Andrew Jacobs nian, congratula formado sira nebé mak tuir ona formação iha área Turismo no Hospitalidade durante período formação nian, no mos hein katak resultado hosi formação ida ne’e sei lori duni vantagem boot ida ba comunidade suco Dare, liu hosi hadia qualidade economia família nian. Presidente Conselho Administrativo no Administrador Geral FSPDD, Rev. Pe. Augusto do Carmo Martins, iha ninia discurso haktuir katak, formação ida ne’e, halo duni mudança ida iha formado sira, liu hosi nia habilidade nebé mak iha. Maibé, laos deit iha mudança, mas tenki iha avança. Significa katak avança ho visão no mehi nebe mak luan, avança iha visão ida hakarak transforma vida ida iha família, hakarak hadia rendimento no economia família nian, no mos desenvolvemento turismo local iha comunidade suco Dare. Nune’e mos, Arcebispo Metropolitana de Dili, Dom Virgílio do Carmo da Silva, SDB, iha ninia discurso haktuir katak espaço Centro Retiro Dare ida ne’e sei precisa recurso humano atu halo serviço hodi tau matan, hadia no hasa’e qualidade atendimento nian ba cliente sira. Tamba ne’e mak liu hosi Projeto “Reflorestação de Dare” iha mos formação área Turismo nian ba foin sa’e sira hosi Dare. Marca mos presença iha cerimónia Entrega Certificado ida ne’e, Vice-Ministra Turismo Comunitário e Cultural, Sra. Inácia da Conceição Teixeira. Iha ninia discurso, Vice-Ministra haktuir katak tuir teoria, Turismo no Hospitalidade ne’e hanesan isin no klamar nebe mak haketak malu. Turismo tanesan nu’udar isin, no, Hospitalidade tanesan nu’udar klamar. Nune’e, turismo no hospitalidade tenki fo apoio ba malu, liu-liu iha campo negócio nian. Basá, iha campo negócio, consumidor, ou, cliente mak liurai. Nune’e, atu atrai consumidor sira hakbesik mai iha ita nia fatin, tenki halo atendimento nebe mak diak ba sira. Hein katak formação iha tempo badak nia laran ida ne’e, bele sai hanesan buka’e ida hodi bele desenvolve di’ak liu tan iha sector turismo nian liuliu iha área Suco Dare.

Resultado hosi formação ida ne’e, mak hatudu liu hosi estudante Abril Marquês tuir ona competição Barista iha evento Road to Expo Dubai 2021, ho hetan resultado 1º. Lugar (14 novembro, 2020) no 3º. Lugar iha competição nacional Fruit Craving Worldskill iha salão Don Bosco Comoro (19 novembro, 2020).

Representante formado sira, Rosito no Delfina, iha sira nia discurso hato’o agredecimento wain ba Fundação São Paulo, serviço hamutuk ho ONG RAEBIA hodi bele realiza atividade formação ida ne’e ba foin sa’e sira iha Suco Dare. Sira mos hato’o agredecimento wain ba formador ETDA no PRO EMA nebé pasciência hodi educa no motiva sira atu bele desenvolve di’ak liu tan iha área turismo no hospitalidade. Formada Delfina, sugere ba Fundação São Paulo ho União Europeia iha Timor Leste, atu atividade capacitação feto foin sa’e sira iha suco Dare bele continua tan iha futuro. Marca presença iha cerimónia ida ne’e, representante inan-aman hosi formado sira, autoridade local no Lia Nain suco Dare.

Cerimónia Entrega Certificado Turismo, Hospitalidade & Gastronomia hala’o iha âmbito projeto “Reflorestação de Dare”, financia hosi União Europeia iha Timor Leste. (Hosi: Rogaia Amélia Castro)