Fundação São Paulo Diocese de Dili (FSPDD) hamutuk ho ONG RAEBIA Timor Leste realiza encontro ida ho autoridade local sira mak hanesan chefe suco Dare no chefe aldeia sira iha suco Dare iha loron 5 agosto 2020 iha sede suco Dare nian. Encontro ida ne’e ho objetivo atui relata kona progresso implementação ativiade eco-farm no eco-turismo hosi Tinan 1 to’o mai iha Tinan 2 hosi Projeto “Reflorestação de Dare”. Iha sorumutu ida ne’e, Presidente Fundação São Paulo, Pe. Augusto do Carmo Martins apresenta kona ba atividade eco-turismo nebé iha Tinan 1 seidauk implementa, maibe, iha Tinan 2 ida hahu ona implementa mak hanesan: Reabilitação Centro Retiro de Dare liu hosi Contrator GAERENEZ UNIPESSOAL LDA; Formação Gastronomia Básica no Atendimento ba 15 participantes iha PRO EMA, no mos, Formação iha área Guia Turística, House Keeping, etc ba 20 participantes iha ETDA Trainers.
Iha parte seluk, Deputy Director ONG RAEBIA Timor Leste, Sr. Mateus Maia haktuir kona ba atividade eco-farm nian nebe mak realiza ona mak hanesan Promoção To’os Foho Lolon Sustentável no Reabilitação Plantação Café. Iha período implementação hosi Tinan 1 to’o mai Tinan 2 ida ne’e, dificuldade nebe hasouru mak hanesan diminuição participação hosi comunidade sira nian iha atividade formação técnica agrícola sustentável, resignação hosi funcionário técnico RAEBIA nian wainhira hala’o serviço iha projeto ida ne’e no mos situação Pandemia COVID-19. Iha sorin seluk, chefe Suco Dare, Sr. Gil de Araújo haktuir katak participação comunidade sira nian menus tambá exigência hosi necessidade família nian nebé halo sira tenki ocupado ho serviço seluk no abandona tiha programa formação kona ba técnica agrícola nebe implementa hosi ONG RAEBIA Timor Leste.
Sorumutu ida ne’e mos fo ocasião ba membro participante sira atu halo apreciação no sugestão ruma hodi bele hadia liu tan implementação projeto ida ne’e. Lian Nain hosi Suco Dare, Sr. Ermelindo hato’o sugestão ba Fundação São Paulo no mos ONG RAEBIA katak aioan hirak nebe mak kuda ona durante período hirak nia laran ne’e precisa halo manutenção, no mos, precisa halo conservação didiak bée matan sira nebé sai nu’udar área intervenção hosi projeto “Reflorestação de Dare” nebe mak hetan ona apoio fundo hosi União Europeia.
