Ohin, Sexta-feira, 01 abril, 2022, marca tan história foun ida iha Arquidiocese Metropolitana de Dili iha nebé liu tiha tinan 80 (ualunulu) mak Santa Sé Apostólica Romana garante ba entidade canónica hodi harí Tribunal Eclesiástico iha país Timor Leste. Mehi inefável ida iha história uma kreda Timor nian nebé ohin sai duni iha realidade liu hosi Abertura Tribunal Eclesiástico iha Arquidiocese Metropolitana de Díli. Iha discurso abertura tribunal eclesiástico, Vigário Judicial de Tribunal Eclesiástica Arquidiocese Metropolitana de Díli, Rev. Pe. Graciano Santos Barros, hasa’e agradeçe wain ba Aman Maromak tamba tulun ba esforço tomak nebé mak halo ona durante ne’e. “Há’u mos husu ita hotu sira nia atenção atu labele husik le’et liu de’it iha ksolok no gratidão ida ne’e ba ita nia pioneiro no protagonista sira mak hanesan: Monsenhor José António da Costa, saudoso Pe. DR. Domingos Sequiera, saudoso Pe. Mateus do Rosário, saudoso Pe. António Gonçalves, saudoso Pe. Ilídio Correia, SDB no mos cononista sira seluk nebé mak dedica ona sira nia moris tamba Povo Maromak nian iha Arquidiocese ida ne’e.” tenik Vigário Judicial iha cerimónia de abertura iha Salão da Arquidiocese, Bidau Lecidere Díli.

Vigário Judicial, Rev. Pe. Graciano Santos Barros, hato’o agradecimento wain mos ba Nunciatura Apostólica iha Timor Leste, nebé sai nu’udar intermédio hahú hosi processo instalação ba to’o iha continuação no comunicação permanente ho Signatura Apostólica hodi harí Tribunal Eclesiástico ida ne’e. “Existência hosi Tribunal Eclesiástico ida ne’e nu’udar contribuição inefavelmente hosi Arquidiocese de Díli hodi garante tentativa tomak liu hosi meio sira nebé necessário no adequado hodi bele soliciona problema canónico sira, concretamente, konaba caso matrimónio, penal no contenciosa sira. Ida ne’e, nu’udar assistência pastoral bo’ot ida nebé Uma Kreda bele halo ba ninia sarani sira”, dehan Pe. Graciano iha ninia discurso.

Entertanto, Tribunal Eclesiástico de Arquidiocese Metropolitana de Díli nu’udar Tribunal ida hosi Primeira no Segunda Instância nian, instituído hosi Arcebispo Metropolita de Díli, ho Decreto número protocolar 189/Ch/IX/2019 iha conformidade ho Direito Canónico no Motu Próprio Mitis Iudex Dominus Iesus de 2015. Tribunal ida ne’e hetan aprovação hosi Supremo Tribunal de Assinatura Apostólica, ho Decreto Protocolar no. 3435/21 SAT. Foro  Apelação hosi Tribunal ida ne’e ba caso matrimonial sira sei processa iha Tribunal interdiocesano iha Diocese sira, Baucau no Maliana, ou, tuir cân. 1443, ba Tribunal da Rota Roma.

Emblema hosi Tribunal Eclesiástico hosi Arquidiocese de Díli ho forma globo iha nebé ilustra ho cor azul, nu’udar símbolo ba Nossa Senhora da Imaculada Conceição, Padroeira Arquidicoese de Díli, iha globo nia klaran iha balanço ho forma cruz ho peso rua iha nia sorin-sorin. Iha peso sorin los hakerek ho alfabeto grego A (Alfa) no iha sorin karuk Ω (Ómega) nu’udar simbolismo hosi equilíbrio, ponderação no imparcialidade justiça nian, iha nebé hahú hosi Cristo no iha Nia mak sei conclui ba salvação klamar sira nian (Salus Animarum) ho suprema lei (Suprema Lex). Iha cruz nia leten iha manu pombo ida nebé configura Terceira Pessoa Santíssima Trindade, Espírito Santo nebé haroman ho nia roman matenek nian hodi ba promoção justiça lolos. Iha nia okos iha liman nebé tane balanço Cruz nebé simboliza ba sira nebé nebé exerce serviço justiça nian sei hala’o serviço ne’e hodi naran  Jesus, Mestre no Pastor.

Iha cerimónia abertura Tribunal Eclesiástico ida ne’e, iha mos intervenção discurso hosi Arcebispo Dom Virgílio do Carmo da Silva, SDB no mos Mons. Marco Sprizzi, Encarregado da Santa Sé iha Nunciatura Apostólica, Díli, Timor Leste. Cerimónia abertura oficial Tribunal Eclesiástica hala’o ho dere babadok simbólo abertura nian hosi Arcebispo Dom Virgílio do Carmo da Silva, SDB no acompanha hosi Ministro de Justiça, Dr. Tiago Amaral Sarmento, Mons. Marco Sprizzi, representante Santa Sé iha Timor Leste, no, Vigário Judicial de Tribunal Eclesiástica, Pe. Graciano Santos Barros. Ninin hosi cerimónia ida ne’e, realiza ho seminário ho tema: “O precesso de anulação matrimonial e apoio espiritual e pastoral para os conjuguês” apresenta hosi orador Pe. Feliks Mikel Kosat, SVD, Vigário Judicial da Diocese de Atambua.