Iha períodu Tinan 3 projeto “Reflorestação de Dare”, membru partisipante iha atividade Eco-Farm  hakiak ona karau iha área promosaun to’os foho lolon sustentável hodi hasae kualidade ba produtu, eh, aihoris sira nebe mak kuda ona iha área to’os foho lolon.

Dadadun nee hakiak ona karau iha promosaun to’os foho lolon, nune, fásil atu utiliza karau teen hodi produs kompos tuir téknika agríkola nebé mak membru partisipante sira hetan ona liu formasaun FFs produsaun adubu kompostu iha Tinan 1 & 2 liu ba ne’e, nebe mak fasilita hosi ONG RAEBIA Timor Leste.

Tuir  membro  Toos nain  (Care Taker) António Perreira Barreto,  hateten, kada loron  atividade neebe nia halo hanesan, tau matan ba plantasaun, no hare  karau nebe mak dadadun nee hakiak iha toos foho lolon.

Duut neebe baibain karau haan mak  hanesan, duut elefante, batar tahan tuan sira, hudi kain, nst. Duut hirak nee mai husi to’os  foho lolon nee rasik, no balu mai husi komunidade sira nia to’os.

 “Ami nia servisu loro- loron mak hanesan Taa duut lori mai tetak to’o rahun didiak, tau iha karau nia haan fatin, nune’e, karau bele konsumu. Aleinde nee, hamoos batar duut, no hasai batar kain sira neebe tuan, hodi tau hamutuk lori mai fó haan karau. Nunee, hau husu ba maluk Timor oan sira tenke badinas halo to’os, no hakiak karau, tanba karau ne’e importante tebes ba moris nu’udar to’os nain, basá, karau nia teen bele fo vantajen di’ak liu husi fó estrume di’ak ba Aii-han produtu lokal sira sai buras iha ita nia toos.”

Bendito Salazar Baptista, staff Fasilitador hosi ONG RAEBIA Timor Leste ba Projeto “Reflorestação de Dare”,   hateten,  karau luhan neebe mak halo bazeia ba promosaun to’os foho lolon, nune’e, fásil liu ba to’os nain sira bainhira halo kompos (rai metan), la presija ba buka tan karau teen to’o Díli, ka ba fatin seluk.

Karau nebe membru partisipante sira hakiak mak karau vaka, hamutuk neen 6, mak hanesan aman 2 (rua), no, inan 4  (haat). Iha loron ida, olheiru (Care Taker) fo han karau hirak ne’e dala 3 (tolu), iha dader, meiu dia no loraik. Nune’e, karau hirak ne’e kosume duut matak iha loron ida hamutuk kilograma 10 (sanulu).

Medida husi karau luhan mak 3m x 9 m, fahe ba espasu 3 (tolu), iha kada espasu sulan karau 2 (rua).

Tuir experiênsia durante ne’e, membru partisipante sira replika ona ténika produsaun adubu kompostu ho utiliza rekursu natural sira mak hanesan ai-lahuk, ai-tahan maran, duut maran no duut matak, hudi koos, nomos, karau teen.

Tan nee karau teen nee importante tebes hodi ajuda prosessu fermentasaun ba produsaun adubu kompostu (adubu ben no maran) hodi fo nutrisaun di’ak ba aihoris sira atu bele buras di’ak iha ita nia toos laran.

Atividade konstrusaun karau luhan no hakiak karau iha Área Demonstrasaun To’os Foho Lolon Sustentável realiza iha âmbitu projeto “Reflorestação de Dare”, financia hosi União Europeia.

Husi: Rogaia Borromeu & Silvestre Castro