Ohin, Sexta-feira, loron 29 janeiro 2021, membro equipa FSPDD nain 3 (F:1/M:2) hamutuk ho membro equipa técnico no staff ONG RAEBIA nain 19 (F:5/M:14), grupo comunidade nain 14 (F:6/M:8), no mos, estudante nain 30 (F:18/M:12) ho docente nain 1 (M:1) hosi Departamento de Conservação dos Recursos Naturais, no, Departamento Processamento Aihan, Faculdade de Tecnologia Agrícola (FAT) – UNPAZ, realiza atividade kuda aioan iha área bée matan ulun Fatunaba, no mos, iha área conservação ba rai iha Centro Retiro de Dare. Aioan sira nebé mak kuda iha área Fatunaba mak hanesan, Mahoni: 210 (atus rua sanulu), Kakeu: 150 (atus ida limanulu), Nimba: 195 (atus ida sianulu resin lima), ho total aioan sira nebé mak kuda iha área refere hamutuk 555 (atus lima limanulu resin lima). Nune’e mos aioan hirak nebé mak kuda iha área conservação rai, iha Centro Retiro de Dare, hamutuk 481 (atus haat ualunulu resin ida). Ho nune’e, total aioan hirak nebé mak kuda iha loron ida ohin hamutuk 1,036 (rihun ida tolunulu resin nén).

Aioan hirak ne’e, tula hosi Centro Viveiro Permanente Maubara ho total 2,901 (rihun rua atus sia ida), mak hanesan: Mahoni: 1,808 (rihun ida atus ualu-ualu), Kakeu: 492 (atus haat sianulu resin rua), no, Nimba: 601 (atus nén ida). Atividade kuda aioan ba loron ida ohin bele realiza, tamba hetan apoio aioan hosi Direção Nacional das Florestas e Gestão de Bacias Hidrográficas – Departamento de Florestação, Conservação do Solo e Água, Ministério da Agricultura e Pescas.

Atividade kuda ai-oan ida ne’e, hala’o iha âmbito projeto “Reflorestação de Dare”, financia hosi União Europeia. (Hosi: Rogaia Amélia Castro)