Ohin, 15 novembro 2022 iha horas tuku 10h00 dader, equipa Delegação União Europeia ba Tailândia liu hosi Finance, Contracts and Audit Section, composto hosi Counsellor Head of Section, Sr. Mário Bruno no Consellor Finance and Contracts Officer, Dona Vaida Kudabiene acompanha ho equipa Delegação União Europeia iha Timor Leste, Finance & Contracts, Sr. Oscar Casamian Marco, Coordenadora ba Projeto “Reflorestação de Dare”, Mana Dulce Gusmão no Sr. Elvis. Maski período implementação projeto “Reflorestação de Dare” remata ona iha loron 31 janeiro 2022, visita ida ne’e ho objetivo atu assiste direta resultado hosi implementação hosi projeto ne’e rasik iha iha área intervenção sira nebé mak fácil atu acesso mak hanesan Comando no Centro Retiro de Dare.
Visita ida hahú uluk hosi área Comando nebé nu’udar fatin hahú uluk formação ba produção adubos no preparação ai-oan iha viveiro. Iha seção ba pergunta no resposta nian, Diretor Executivo RAEBIA TL, hato’o esclarecimento klean ba pergunta sira hosi equipa Delegação União Europeia nian konaba processo tomak implementação atividade sira mak hanesan Conservação ba Rai no Bée, no, Eco-farm desde fase início levantamento de dados, socialização ba atividade microprograma iha cada aldeia iha suco de Dare, seleção ba participante agricultor sira hodi participa iha formação microprograma, fase formação atividade microprograma, no, replicação ba técnica agrícola iha agricultor sira ida-idak nia to’os.
Iha Comando, equipa ida ne’e mos halo visita ba fatin viveiro, no área rehabilitação café. Aporveita mos iha ocasião ida ne’e, Care Taker sira iha Comando ofereçe batar fini ba membro equipa sira hodi kuda iha teraço/to’os foho lólon Comando.
Husik tiha Comando, equipa sira hakat liu ba visita Centro Retiro de Dare nebé mak hola parte iha atividade eco-turismo, liu hosi obra reabilitação ba espaço sira iha uma retiro. Iha ocasião ida ne’e, Presidente Fundação São Paulo, Rev. Pe. Augusto C. Martins apresenta ba equipa sira konaba processo início recrutamento ba consultor construção civil, consultor ba EU Procedures, processo tenderização no seleção ba empresa hodi executa Obra Reabilitação Uma Retiro. Apresenta mos filmagem iha Sala de Conferência konaba processo início obra nian to’o obra concluída. Pe. Augusto mos apresenta konaba funcionamento hosi Uma Retiro ida ne’e, funcionário sira nebé mak presta serviço iha fatin refere no rendimento nebé mak ganha liu tiha período implementação projeto “Reflorestação de Dare”.
Visita ida ne’e remata ho almoço hamutuk ho funcionário no Care Taker sira iha Dare, no, hosi parte Fundação São Paulo ofereçe mos lembrança produto Dare nian mak hanesan Café Moca no Cravinho ba bainaca sira.
