Ohin, 22 Dezembro 2021, iha aldeia Lemorana suco Dare, grupo agricultor nain 15 (F-8/M=7) continua hatudu tan sira nia vontada hodi participa iha formação inicial kona ba contrução “Ai Matenek” (Ai quadrado ho modelo letra A) ho ninia funcionamento no aplicação ba iha rai lolon. Formação ida ne’e facilita hosi técnico sira hosi ONG RAEBIA Timor Leste iha âmbito projeto “Reflorestação de Dare.” Maski período implementação ba projeto ida ne’e atu besik dadaun ona to’o iha ninia rohan, maibe hosi direção Fundação São Paulo hamutuk ho equipa ONG RAEBIA Timor Leste sei fo nafatin biban ba comunidade agricutor sira iha suco Dare nebé mak sei iha nafatin vontade hakarak aprende tan técnica agrícola nian hodi desenvolve iha to’os foho lolon.

Liu tiha instrução kona ba criação “Ai Matenek” hosi técnico sira, participante sira hakat liu ba iha área demonstração to’os foho lolon hodi halo experimentação. Participante sira hahu halo marcação ba linha kontur ho objetivo hodi halo implantação ba terraços. Iha atividade ida ne’e, seidauk bele halo implantação ba terraços tamba sei iha hela clima udan monu rai, nune’e, realiza uluk atividade kuda ai-oan tuir área nebé mak tau ona marcação. Nune’e, participante sira hamutuk ho equipa Fundação São Paulo no ONG RAEBIA continua kuda kedas ai-oan cacao hamutuk 196 iha área demonstração to’ot foho lolon permanente-Lemorana. Ai-oan hirak ne’e transplanta hosi viveiro Comando Dare hamutuk 300. Tuir plano, atividade kuda ai-oan sei continua tan iha loron hirak tuir mai iha área Lemorana. (Hosi: Rogaia Castro)