Fulan ida ne’e, tama ona ba fulan 36 (tolunulu resin nee) implementação projeto Reflorestação de Dare. Nune’e, iha loron 11 janeiro 2022, organização implementadora sira ba projeto ida ne’e mak hanesan Fundação São Paulo (FSP) no RAEBIA Timor Leste realiza sorumutu ba dala ikus hamutuk ho líder local, lian nain, chefe juventude no membro agricultor sira hosi suco Dare iha Sala de Conferência Centro Retiro de Dare (CRD) hodi avalia hamutuk konaba resultado hosi implementação projeto ida ne’e. Dados ba sorumutu liu hosi discussão grupo nian, sei sai nu’udar referência ba FSP ho RAEBIA hodi desenvolve documento Endline ba projeto final Reflorestação de Dare.

Sessão de Apresentação Atividade e Resultado Atingido

Iha sessão dahuluk, Diretor executivo RAEBIA Timor Leste, Sr. Mateus Maia halo apresentação kona ba progresso tomak desde atividade início iha fulan fevereiro 2019 to’o mai iha fulan dezembro 2021. Iha sessão ida ne’e apresenta konaba atividade eco-farm hodi halo comparação ba resultado nebé mak atingi ona hosi período Ano 1 – Ano 3. Tuir resultado nebé mak iha, indica katak colheita batar iha área Demo Plot iha fulan fevereiro 2020, fo duni resultado nebé mak di’ak wainhira aplica tuir técnica agrícola recomendada. Iha fali fase ano 2021 nian, grupo agricultor 4 (haat) mak desenvolve duni técnica hirak ne’e iha sira ida-idak ninia fatin mak hanesan grupo Fatunaba, Nahaek, Sucalau no Lemorana.

Sessão tuir fali mai, Presidente Fundação São Paulo, Rev. Pe. Augusto C. Martins apresenta kona ba atividade eco-turismo nebé inclui formação iha área Turismo no Hospitalidade – Gastronomia Básica no Atendimento ba foin sa’e 38 (tolunulu resin ualu) hosi suco Dare, no mos realização hosi obra realibilitação ba espaço Centro Retiro de Dare (CRD). Hosi foinsa’e 38 (tolunulu resin ualu) ne’e, 55% hetan ona serviço mak hanesan iha Centro Retiro de Dare, Cantina Patris Corde no fatin seluk tan. Ao passo que, resultado hosi obra reabilitação CRD atingi ona 98%.

Sessão Discussão em Grupo

Iha sessão discussão grupo nian, facilita hosi equipa RAEBIA, Sra. Leonora ho 2 estudante estagiário UNPAZ, hodi orgraniza membro sira wainhira halo discussão iha grupo konaba atividade eco farm. Discussão grupo ida ne’e fahe grupo autoridade local no mos agricultor sira. Iha sessão apresentação resultado discussão nian, maioria hosi agricultor sira fo testemunha katak projeto ida ne’e lori duni benefício ba comunidade Dare. Participante sira mos apresenta kona ba dificuldade hirak nebe mak durante ne’e hasoru mak hanesan la iha bée suficiente hodi desenvolve to’os iha terras. Agricultor sira mos consciente katak iha membro grupo balu nebé desde início participa iha formação maibe ikus mai dada-an hosi atividade ida ne’e tamba la simu osan durante mai participa iha atividade formação eco-farm. Ao passo que resultado discussão hosi grupo líder local sira fo mos apreciação positiva ba implementação atividade reflorestação de Dare, no sira mos hato’o recomendação Fundação São Paulo no RAEBIA Timor Leste atu atividade formação agrícola nian bele continua implementa nafatin iha suco Dare maski projeto ida ne’e  to’o dadaun ona iha ninia rohan.

Grupo participante Eco Turismo

Atividade eco-turismo impelementa direta hosi Fundação São Paulo, nune’e, iha ocasião ida ohin, FSP mos lança questionário ba participante hirak nebé mak tuir ona formação turismo-hospitalidade atu preenche individual. Dados hosi respondente sira nian sei sai mos nu’udar evidência hodi desenvolve documento Endline report.  (hosi: Rogaia Castro).