Mana Aida de Araújo, nu’udar participante ida hosi aldeia Sukalau, suco Dare. Mana Aida de Araújo mos exerce cargo nu’udar chefe aldeia Sukalau, suco Dare. Mana Aida mos tuir ona formação técnica agrícola sustentável, facilita hosi ONG RAEBIA Timor Leste, iha âmbito projeto “Reflorestação de Dare” financia hosi União Europeia. Liu hosi dadalia ho staff Fundação São Paulo, mana Aida hakarak mos conta ninia história ba belun feto maluk sira hotu, kona ba experiência nebé mak durante ne’e nia hetan wainhira tuir ona formação técnica agrícola iha to’os foho lolon permanente, Dare.

“Ami tuir formação durante fulan 3 (tolu) to’o 4 (haat) hanesan ne’e, hosi ONG RAEBIA Timor Leste iha área demonstração besik uma Retiro Dare. Saida mak ami aprende mak hanesan oinsa halo adubo maran, oinsa halo terras iha rai lolon ho usa ai bingkai A (ai matenek). Material sira nebe mak usa hodi halo adubo maran no adubo ben ne’e, mai hosi to’os laran, mak hanesan aitahan matak, duut maran, karau ten, bibi ten, batar kain, ai-maran lahuk, hudi koos, nst. Ami mos aprende oinsa produz adubo bokon hodi rega ba aihoris sira. Iha período hanesan, ami mos aprende kona ba oinsa prepara fini iha polyback, liuliu fini aifuan. Fatin formação nian ami halo iha Comando Dare.”

Liu tiha formação ida ne’e, durante período Estado de Emergência ba dala uluk, mana Aida iha iniciativa rasik hakarak desenvolve técnica agrícola ida ninia to’os foho lolon rasik. Mana Aida desenvolve ninia teras ho medida 18 x 18 m. Nia senti katak formação técnica agrícola ida ne’e fo tebes vantagem boot ida ba nia.

“Antes ami toman sunu aitahan, duut maran, hodi hetan estrume ba aihoris sira. Liu tiha formação ida ne’e, ami hatene ona cuidado aitahan, duut maran, karau tem, hodi produz fali adubos ka rai metan ba aioan sira iha terras nebe mak ami prepara ona.”

Aihoris sira nebé dona Aida kuda mak batar, fore no mos kuda aifuan hanesan rambutão no durião.

“Ami nia rai ne’e, qualidade maran no toos. Maibe, wainhira aprende tiha técnica halo “terras kompos”, aioan sira hanesan rambutão bele moris hodi diak, tamba wainhira udan mai, bele halibur fali estrume sira iha kadalak “terras kompos nian”, nune’e halo rai bokon hela deit, no aioan bele buras ho diak.”

Mana Aida mos hetan rendimento balu hodi ajuda fali oan sira nia escola liu hosi fan produto sira hosi ninia to’os laran ba mercado.

“Iha há’u nia to’os laran, fan ona aifarinha ba mercado. Há’u mos kuda “maek” iha to’os tamba “maek” folin tebes, kilo ida $ 5.00, nune’e, bele ajuda tebes osan rahun ruma ba oan sira nia escola. Maibe, buat hot-hotu tenki mai hosi vontade. Hanesan ami feto, vontade atu aprende no serviço mak rikusoin lolos iha família.”

Fundação São Paulo serviço hamutuk ho ONG RAEBIA Timor Leste hodi implementa projeto “Reflorestação de Dare”, financia hosi União Europeia. Projeto ida ne’e atu tulun comunidade sira iha suco Dare hodi bele desenvolve diak liu tan técnica agrícola to’os foho lolon nian, hodi ikus mai lori mos benefício ba mudança economia iha família.