Ohin, sábado, 06 março, 2021, equipa técnica ONG RAEBIA TL, hamutuk ho equipa Fundação São Paulo, grupo agricultor, membro OJT (On Job Training) no representante autoridade local, liuliu chefe aldeia hosi Fatunaba no Lemoana, realiza cerimónia colheita batar iha área promoção to’os foho lolon-Dare. Atividade ida ne’e hahu hosi tuku 10h00, no remata iha tuku 12h00 OTL. Iha cerimónia colheita batar ida ne’e, Diretor Executivo ONG RAEBIA, Sr. Mateus Maia hato’o lia menon katak resultado ba produto batar hetan quantidade barak compara fali iha tinan kotuk. Tan ne’e, nia dehan: “agradeçe ba dala uluk ba Maromak nebe acompanha nafatin ita ninia atividade Eco-farm ida ne’e bele la’o ho diak. Agradece mos ba hotu-hotu ninia vontade no esforço hakarak participa atividade sira durante iha tinan ruan nian. Dificuldade boot nebe hasoru durante tinan 2 (rua) nia laran mak participante sira menus ba bebeik. Maibe, husu nafatin atu grupo ida ne’e (Lemorana, Sukalau, Fila Be ba Tua, Fatunaba no Nahaek) atu participa ativa, no continua replica técnica agrícola hirak ne’e iha ida-idak ninia fatin.”
Presidente Fundação São Paulo, Pe. Augusto C. Martins, afirma katak grupo agricultor hirak nebe mak marca presença iha fatin ne’e sai nu’udar testemunha ba resultado batar iha área promoção to’os foho lolon. “Imi mak sai nu’udar sasin ba atividade hirak nebe mak ita hala’o ona iha tinan rua nia laran, ho resultado nebé hanesan agora ita hare dadaun. Doador União Europeia fo apoio fundo mai ita liu hosi projeto “Reflorestação de Dare”. Apoio fundo ida ne’e, liuliu atu lori benefício ba comunidade sira iha suco Dare.”
Iha cerimónia ida ne’e, participa mos estudante grupo turismo nian nebe remata ona sira nia curso iha area turismo no hospitalidade iha dezembro, 2019. Estudante sira mos hare ho matan resultado hosi atividade eco farm nebe mak facilita hodi técnico RAEBIA TL.
Marca mos presença iha cerimónia ne’e, Estencionista MAP, Sr. Salvador Ribeiro, Pe. Ângelo Salsinha, Pe. Mariano Maia, Pe. José Mariano, Dc. Melchior no Fr. Rui Aça-Mau.
Total participante sira hamutuk 65 (F:32/M:33). Participante sira senti haksolok tamba foin ba dala uluk mak halo cerimónia colheita batar iha suco Dare tuir técnica nebé mak comunidade sira aprende ona.
Entertanto, depois silu batar, membro sira halo kedas seleção ba resultado batar nebé mak colheita, hodi fahe qualidade produto batar iha parte 3 (tolu), no, tetu kedas tuir ida-idak nia kilo, hanesan tuir mai ne’e: a). Batar fini: 179 kg; b) Batar consumo: 133 kg; no c). Batar inútil (batar aat): 14 kg. Total colheita batar ba loron ida ohin, hosi total comprimento área 537m x 1.2m, iha área promoção to’os foho lolon permanente mak 326 kg.
Atividade Colheita Batar halo iha âmbito projeto “Reflorestação de Dare”, financia hosi União Europeia iha Timor Leste.
Hosi: Rogaia Borromeu & Silvestre Castro
