Atividade “ubinan batar” hanesan  dalan ida hodi determina produtividade no produto batar iha área to’os foho lolon sustentável. Atu bele hetan resultado hosi produto batar nebé mak kuda ona iha área demonstração to’os foho lolon permanente-Dare, ohin, terça-feira, 02 março, 2021, equipa técnica ONG RAEBIA TL, hamutuk ho equipa Fundação São Paulo, ho mos grupo agricultor no membro OJT (On Job Training) realiza atividade “ubinan” batar iha área promoção to’os foho lolon-Dare. Objetivo hosi atividade “ubinan” ida ne’e, atu halo calculação estimativa certa ida ba produto batar iha área ida ne’e. Método halo conta calculação ba produto batar ho dalan tradicional mak hanesan usa metro hodi sukat comprimento área, prepara plástico hodi tétu produto batar iha “dasi” hodi bele hatene quantidade produto batar hosi medida determinada ida.

Nune’e, atividade “ubinan” batar hahu hosi sukat uluk medida iha filheira “terras banku” ho comprimento 2 x 2 m². Método ida ne’e facilita hosi Coordenador técnico ONG RAEBIA TL, no acompanha hosi membro agricultor sira. Área experimentação hodi halo “ubinan” fahe ba parte 3 (tolu), ho foti dados hosi área central to’os foho lolon permanente-Dare hosi total comprimento 537m x 1.2m.

Resultado hosi cada área nebé mak halo ona “ubinan” batar hanesan haktuir iha tabela tuir mai ne’e:

Dados iha tabela leten ne’e, nu’udar fase dahuluk hodi halo cálculo ba produto batar iha área promoção to’os foho lolon sustentável-Dare. Tuir técnico RAEBIA TL haktuir katak dados “ubinan” ida ne’e seidauk to’o iha fase final, tamba sei hein habai maran lai batar sira nebé mak halo ona “ubinan” ne’e. Wainhira batar sira nebé mak halo “ubinan” ne’e maran ona, sei tetu fila fali hodi total kilograma hodi cada “ubinan” batar, hafoin halo soma total, ho adopta fórmula nebé mak recomendade ona.

Atividade “Ubinan Batar” halo iha âmbito projeto “Reflorestação de Dare”, financia hosi União Europeia iha Timor Leste.

Hosi: Rogaia Borromeu & Silvestre Castro