Iha loron, Sábado, 27/02/2021 equipa Fundação São Paulo Diocese hamutuk ho equipa ONG RAEBIA TL, halao sorumutu ho membro grupo agricultor sira hosi aldeia Lemorana, Fila Bé ba Tua, Sukalau, Fatunaba no Nahaek. Objetivo hosi sorumutu ida ne’e mak, atu halo avaliação ba atividade nebé mak implementa ona tinan 2020 (tinan daruak implementaçào projeto “Reflorestação de Dare”). Total participante iha sorumutu ida ne’e hamutuk 34 (F:13/M:21). Maioria hosi membru participante sira haktuir katak técnico nebé mak durante ne’e sira aprende ona iha formação, iha início implementação programa ida ne’e, sira replica ona iha ida-idak ninia fatin. Representante hosi membro Sukalau nian, Sra. Aida de Araújo haktuir katak qualidade rai iha ninia to’os Fatusuka, antes ne’e kuda aihoris la moris tamba rai-mean no rai-to’os. Wainhira replica técnico “terras banku” no “terras compos”, no aplica adubo orgânico ba rai, nia consegue kuda fore tali, kanku, bele moris, no buras, no nia ho ninia família mos consume ona.
Representante hosi grupo Fatunaba, Sra. Amélia Barreto haktuir katak, agora dadaun nia kuda hela batar, tunis no fore iha ninia to’os tuir técnica nebe mak nia aprende ona iha formação. Nia rasik hakarak halo prova ba aihoris sira nebe mak nia kuda. Por exemplo, iha filheira “terras banku” balu, nia kuda batar usa “adubo orgânico”, no iha área filheira balu, la usa “adubo orgânico.” Resultado nebe mak nia hetan katak área nebe mak usa “adubo orgânico” batar moris mai ho buras no fulin boot, do que, área nebé mak la usa “adubo orgânico”, batar moris mai “raes” hela.
Representante hosi grupo Nahaek, Sr. José Barreto haktuir katak durante ne’e, nia mos replica técnico nebe mak nia aprende ona iha formação. Área nebe mak nia desenvolve hodi kuda aihoris sira quase 1 héctar. Durante tempo bailoron, nia kuda deit mak aidila iha to’os foho lolon, no, wainhira colheita, nia fan tutuir ba mercado. Agora dadaun nia kuda batar iha área to’os foho lolon ninian rasik.
Membro comunidade sira haktuir katak wainhira replica técnico agrícola ida ne’e, fo duni resultado di’ak iha sira nia to’os. Maibe, dificuldade nebé mak sira hetan mak “hamah” ka ular oan (insecta) no laho, nebé mak mai han tutuir tiha sira nia aihoris sira hanesan batar, fore talin, nst iha sira nia to’os. Nune’e, sira husu ba técnico ONG RAEBIA TL atu bele mos fo formação kona ba utilização recurso natural sira hodi bele hamate ular oan ka “hamah” nebe mak sempre mai estraga aihoris sira.
Iha sorumutu ida ne’e, comunidade sira participa ativa, no, sira espera katak iha período Ano 3 ida ne’e, sira mos sei hetan nafatin oportunidade hodi tuir tan formação ho módulo seluk kona ba técnica agrícola sustentável. Membro sira agredece teb-tebes tamba formação técnica agrícola ida ne’e sira foin mak ba dala uluk implementa iha Suco Dare.
Iha biban ida ne’e, membro comunidade sira mos simu brohura manual formação técnica agrícola sustentável, comisola, cantil no chápeu, nebé mak entrega diretamente hosi Presindente Fundação São Paulo, Rev. Pe. Augusto C. Martins, no Diretor Executivo ONG RAEBIA TL, Sr. Mateus Maia.
Liu tiha sorumutu ida ne’e, aproveita ho biban balu nebe mak sei iha, membro comunidade sira hamutuk ho equipa Fundação São Paulo, no ONG RAEBIA TL hakat kedas ba área plantação café nian, hodi assiste explicação kona ba técnica poda café facilita hosi técnico ONG RAEBIA Timor Leste, Sr. Luciano dos Santos.
