Mana Isabel José Soares hosi aldeia Fila Bé Ba Tua, Suco Dare. Nia halao knar nu’udar dona da Casa. Mana Isabel nu’udar responsável ba Cozinha iha Uma Retiro Dare. Mana Isabel hala’o knar ida ne’e durante tinan 22 (ruanulu resin rua) iha Uma Retiro Dare, hodi tein hahan ba participante sira mak mai halo encontro no retiro mak hanesan seminarista sira, amululik sira, religiosa sira, no mos grupo sira seluk tan.
Iha fulan Agosto, 2020 mana Isabel tuir formação kona ba Gastronomia Básica no Atendimento iha PRO EMA. Mana Isabel senti katak ne’e oportunidade diak atu aumenta tan ninia conhecimento.
“Durante tuir formação iha PRO EMA, há’u aprende oinsa mak usa produto local sira hanesan fehuk, lakeru no talas hodi halo fali pão.”
Mana Isabel tuir formação iha PRO EMA durante loron 90 (sianulu).
“Durante tuir formação ne’e, ami aprende buat barak. Mai há’u pessoalmente, há’u gosta liu aprende iha cozinha, tamba tempo naruk ona mak há’u halo serviço iha cozinha Uma Retiro Dare. Liu hosi formação Gastronomia Básica no Atendimento, há’u bele halo rasik pão hosi produto local. Há’u hakarak aprende liu tan, nune’e, iha futuro bele hasa’e rendimento iha família.”
Mana Isabel mos haktuir tan katak formação nebé mak nia hetan ne’e folin boot tebes ba nia, tamba babain nia tein hahan ba participante sira iha Uma Retiro Dare, tuir deit ninia conhecimento nebé mak nia iha.
“Agora ne’e, há’u bele ona halo pão hosi lakeru, talas no fehuk midar hodi bele ofereçe ba participante sira iha ne’e. Menu ba aihan mos iha ona mudança tuir saida mak ami aprende ona durante tuir formação iha PRO EMA. Hanesan feto ida, Há’u la baruk atu aprende”
Fundação São Paulo implementa atividade Eco-Turismo liu hosi formação Gastronomia Básica no Atendimento ba participante sira iha suco Dare. Fundação São Paulo serviço hamutuk ho ONG RAEBIA Timor Leste hodi implementa projeto “Reflorestação de Dare”, financia hosi União Europeia. Projeto ida ne’e atu tulun comunidade sira iha suco Dare hodi bele desenvolve diak liu tan iha área turismo hodi ikus mai lori mos benefício ba mudança economia iha família.
