Ohin, segunda-feira, loron 3 maio, 2021, Fundação São Paulo Diocese de Díli halo parceria ho ONG RAEBIA Timor Leste, distribui material apoio emergência nian ba família afetada hosi inundação, no mos família hirak nebé hasoru dificuldade alimentação durante período implementção cerca sanitária iha suco de Dare. Total família hirak nebé mak hetan apoio emergência ida ne’e hamutuk uma kain 120 (atus ida ruanulu) hosi aldeia sia iha suco Dare mak hanesan: Bouloc, Fatunaba, Nahaek, Sucalau, Fila Bé Ba Tua, Culau I, Culau II, Lemorana no Casnafar. Dados Ficha de Família hosi uma kain hirak nebe mak simu apoio emergência mai hosi autoridade local, chefe suco no chefe aldeia sira, no, submete ba equipa Fundação São Paulo hodi verifica, elabora, no ikus mai, submete ba doador União Europeia hodi hetan aprovação, molok execução atividade.
Pacote material hirak nebé mak distribui ba família ida-idak mak hanesan: fos 25kg saka ida, mina Bimoli 5 litros masa ida, sabaun, pastadente, escova kose nehan, handsanitizer, mascra, masin, no ikan sardina lata. Orçamento ba apoio material hirak ne’e mai hosi União Europeia liu hosi projeto “Reflorestação de Dare”. Iha sorin seluk, chefe do Suco Dare, Sr. Gil de Araújo, hato’o agradeçe wain ba Fundação São Paulo liu hosi cooperação ho União Europeia bele fo ona apoio ba família vítima hirak nebé mak afetada hosi inundação. Presidente Fundação São Paulo, Pe. Augusto Martins, afirma tan katak apoio ida ne’e realiza tamba Fundação São Paulo hato’o pedido ba doador União Europeia hodi bele reajusta orçamento atividade nian, no, realoca fali custo ruma ba apoio emergência ida ne’e, tamba, impacto hosi inundação ne’e aconteçe duni iha área intervenção projeto “Reflorestação de Dare” iha suco Dare. Iha sorin seluk, Pe. Augusto haktuir tan katak, iha atividade formação eco-farm nian, ho objetivo ida atu oinsa comunidade iha suco Dare bele aprende kona ba sustentabilidade aihan ba tempo naruk, liu hosi formação konaba técnica agrícola sustentável nebe mak aprende ona hosi ONG RAEBIA Timor Leste. Maibé, ho aplicação Cerca Sanitária iha município Dili, limita ona movimento comunidade sira nian hodi hakat mai atu participa formação contínua kona ba técnico agrícola sustentável iha Demo Plot-Dare. Nune’e, membro grupo hirak nebé mak tuir ona formação iha eco-farm no eco-turismo hetan mos consideração ba apoio emergência.
Atividade apoio emergência ida ne’e, realiza iha âmbito projeto “Reflorestação de Dare”, financia hosi União Europeia iha Timor Leste. (Rogaia Amélia Castro)
