Ohin, segunda-feira, loron 31 maio, 2021, tuku 11h00 OTL, iha Salão Arquidiocese Díli, realiza Cerimónia Assinatura Estatuto Universidade Católica Timorense – São João Paulo II, hosi Arcebispo Dom Virgílio do Carmo da Silva, SDB. Cerimónia ida ne’e bele realiza tamba serviço hosi equipa Comissão Instaladora da Universidade Católica de São João Paulo II, liu hosi ninia secretariado nebé mak hahú dadaun ona sira nia serviço iha loron 12 março 2021, tuir Decreto No.02/2021. Total artigo iha Estatuto UCT – São João Paulo II hamutuk 60 (nén-nulu). Liu assinatura aprovação ba Estatuto UCT, Arcebispo Dom Virgílio do Carmo da Silva, SDB entrega simbolicamente Estatuto UCT ba Vigário Episcopal para Assuntos da Educação, Pe. Guilhermino da Silva, no Presidente do Conselho Administrativo & Administrador Geral Fundação São Paulo Diocese de Díli (FSPDD), Pe. Augusto do Carmo Martins.
Iha discurso badak, Archebispo haktuir katak iniciativa atu loke Universidade Católica hahú ona desde tinan 2002 hosi Dom Carlos Filipe Ximenes Belo, SDB, iha nebé forma dadaun ona comissão instaladora ida iha nível Diocese Díli nian hodi trata konaba assunto Universidade Católica nian. Iha período episcopado Dom Alberto Ricardo da Silva nian, hahú ona desenvolve parte infraestrutua básica universidade católica nian. Nune’e, iha tinan 2016, Dom Virgílio do Carmo da Silva, SDB halo fali sorumutu ida ho clero Diocese Díli hodi koalia fali konaba continuação obra universidade católica. Liu tiha tinan lima episcopado Arcebispo nian, iha tinan 2021 ida ne’e, forma fali comissão instaladora ida hodi hahu servíco preparação ba universidade católica nian.
Membro hirak nebé mak hola parte iha comissão instaladora universidade católica nian mak hanesan: Pe. Guilhermino da Silva (Coordenador), Pe. Augusto do Carmo Martins (vice-Coordenador), Dr.João Câncio Freitas (Secretário I), Dr. Agapito da Costa Jerónimo (Secretário II), Dr.Domingos Sousa, Pe. Bento Barros Pereira, Pe. Ivo Martins Hí da Silva, Pe.Graciano Santos Barros, Br.Richard Suttle, CMF, Pe.Dr.Joel Casimiro Pinto, OFM.
Participa iha cerimónia ida ne’e ema hamutuk 30 (tolunulu). Cerimónia ida ne’e remata ho almoço confraternização iha cantina “Patris Corde” Arquidiocese Dili. (Rogaia Castro)
