Ohin, quinta-feira, loron 10 junho, 2021, tuku 09h30 OTL, iha recinto Arquidiocese Díli, realiza cerimónia inauguração ba Cantina “PATRIS CORDE” (Tt: “Fuan Aman Ida Nian). Cantina ida ne’e nu’udar cantina dahuluk nebé existe iha recinto Câmara Ecelesiástica Arquidiocese Dili hodi fo apoio alimentação ba staff no cliente sira iha recinto Câmara Eclesiástica. “Cantina ida ne’e ho naran “PATRIS CORDE” ka “Fuan Aman Ida Nian” tamba tinan 2021 ida ne’e Igreja Universal celebra tinan ba “Fuan Aman Ida Nian”, dehan Dom Virgílio iha ninia discurso. “Existência hosi cantina “PATRIS CORDE” ho objetivo atu facilita fali trabalhador sira hosi cada departamento iha arquidiocese nian nebé hala’o serviço iha escritório geral Arquidiocese Metropolitana, Dili, no mos atu facilita cliente hirak nebé mak hakat mai trata documento sira iha direção chancelaria Arquidiocese nian”, tenik Arcebispo Dom Virgílio.

Gestão tomak ba Cantina “PATRIS CORDE” sei hala’o hosi Fundação São Paulo Diocese de Díli (FSPDD). Iha discurso Presidente FSPDD nian, Pe. Augusto Martins, dehan: “pessoal hirak nebé mak sei hala’o serviço iha Cantina “PATRIS CORDE” mai hosi foinsa’e hirak nebé mak hetan ona formação iha área Turismo Hospitalidade no Gastronomia Básica & Atendimento iha ETDA no PROEMA liu hosi projeto “Reflorestação de Dare” nebé financia hosi União Europeia iha tinan kotuk liu ba.” Nia hatutan tan dehan: “Montante inicial ba investimento Cantina ida ne’e ho valor USD 10,000.00. Montante ida ne’e sei fahe ba custo instalação ba equipamento cozinha nian no mos salário ba pessoal sira iha cantina ne’e rasik.” Iha sorin seluk pessoal sira hosi Cantina “PATRIS CORDE” halo apresentação konaba menu hirak nebé mak sei ofereçe hosi Cantina “PATRIS CORDE”, hosi cada unidade mak hanesan: restaurante, paderia, cafetaria, babidas no frutas.

Participa iha atividade inauguração cantina “PATRIS CORDE” ida ne’e mesak diretor no staff sira hosi cada Departamento Arquidiocese Dili nian mak hanesan Comissão da Justiça e Paz, Caritas Diocesana Díli, DEJUKDIL, Departamento da Educação, Engenaria Comissão Técnica Diocesana, no staff sira hosi Economato, Chancelaria no Fundação São Paulo Diocese Dili.

Horário ba atendimento hosi Cantina “PATRIS CORDE” hahú loke hosi tuku 08:00 – 18:00 OTL hosi loron Segunda-feira to’o Sexta-feira. Preço hosi produto hira nebé mak sei ofereçe hosi Cantina “PATRIS CORDE” hahú hosi montante USD 0.25 – USD 2.50. Cantina ida ne’e mos bele ofereçe Catering ba cliente hirak nebé mak iha interesse. (Rogaia Castro)