Iha encontro internal ne’ebé halo iha gabinete Ministerio da Agricultura e Pescas (MAP)  ne’e, Presidente Fundação são paulo Diocese de Dili ( FSPDD), Pe. Augusto do Carmo Martins  apresenta ba Ministro da Agricultura e Pescas, Sua Ex.cia Eng. Pedro dos Reis kona ba atividades sira hosi Projeto Reflorestação de Dare nebé mak hetan apoio fundos hosi doador União Europeia iha Timor Leste. Duração ida ne’e ho duração tinan tolu, ho ninia localização iha suco Dare, Posto Administrativo de Vera Cruz, Município de Díli. Área intervenção hosi projeto ne’e rasik mak aldeia sanulu hosi suco Dare. Projeto ida ne’e rasik hahu implementa iha loron 1 fevereiro 2019, no, sei remata iha loron 31 janeiro 2022.

Iha parte seluk Direitor ONG RAEBIA TL, Sr. Xisto Martins apresenta ba Sua Ex.cia konaba impacto no resultado hosi projeto ne’e ba beneficiário sira hosi suco Dare. Nia dehan: “programa ida ne’e fo duni benefício ba comunidade sira iha suco Dare. Nu’udar prova mak wainhira ami halo reunião avaliação konaba desenvolve terras (terasering) iha comunidade sira nia to’os, maioria fo testemunha katak wainhira mosu inundação iha loron 4 abril liu ba ne’e, terras la hetan estragos.” Diretor ne’e mos hatutan ninia pedido ba Sua Ex.cia atu to’o iha momento projeto ne’e remata karik, hosi Direção MAP nian bele fo mos atenção ida ba situação atividade reflorestação iha Dare, liu hosi apoio recurso humano MAP nian, liuliu Extencionista sira hodi bele ajuda iha terreno.

Hatan ba questão hirak ne’e, Ministro da Agricultura e Pescas, Eng. Pedro dos Reis hakarak mos cria programa ida kona ba conservação ba bée matan sira, no mos, incentiva comunidade sira ho custo ex. 0.25 $/ai-aon, hodi bele kuda besik iha bée matan sira. No, sei haruka equipa hosi MAP nian hodi fiscaliza ai-oan hirak nebé mak kuda ona iha terreno.

Objetivo seluk hosi sorumutu ida ne’e, nu’udar mos convite ida hosi Fundação São Paulo hodi husu disposição hosi Ministro da Agricultura e Pescas nian, liu hosi Direção MAP nian hodi participa iha entrevista nebé mak sei realiza hosi missão de Revisão ROM (Results Oriented Monitoring / monitorização com base nos resultados) ba projeto “Reflorestação de Dare” hosi loron 14 – 22 setembro, 2021.

Sorumutu ho duração horas ida nia laran ne’e, remata ho entrega recordação produto Dare nian mak hanesan Café Robusta no Cravinho hosi Presidente FSP, Pe. Augusto ba Sua Ex.cia Ministro da Agricultura e Pescas, Eng. Pedro dos Reis. (Hosi: Rogaia Castro).