Ohin, Segunda-feira, 6 Setembro, 2021, equipa Fundação São Paulo hamutuk ho Diretor ONG RAEBIA Timor Leste, Sr. Xisto Martins halo sorumutu ida ho Chefe de Gabinete, Sr. Maeni Calado hamutuk ho Assessor iha sala de reunião do Ministério do Turismo, Comércio e Indústria (MTCI), Bebora Díli. Iha sorumutu ida ne’e, Presidente Fundação São Paulo, Rev. Pe. Augusto do Carmo apresenta objetivo hosi reunião nian, liuliu apresenta konaba atividade sira nebé hola parte iha programa Eco-Turismo nian, inclui ninia resultado no impacto sira ba iha comunidade suco Dare nian liu hosi Projeto “Reflorestação de Dare.” Progresso no atingimento hosi programa Eco-Turismo nian nebé mak implementa ona iha suco Dare, hetan apreciação di’ak hosi Direção MTCI, liu hosi Chefe de Gabinete, Sr. Maeni Calado. “Ami sei apresenta resultado hosi implementação atividade Eco-Turismo iha suco Dare ba ita nia Ministro MTCI, Dr. José Lucas do Carmo da Silva. Entertanto, ita nia Sua Ex.cia la bele marca presença iha reunião ida ne’e, tamba iha ona agenda seluk ba iha loron ida ne’e.” Chefe de Gabinete ida ne’e mos salienta tan katak nia sei apresenta ba Ministro MTCI konaba cooperação ba futuro hosi atividade Eco-Turismo iha Dare.

Objetivo seluk hosi sorumutu ida ne’e, nu’udar mos convite ida hosi Fundação São Paulo hodi husu participação hosi MTCI nian iha entrevista nebé mak sei realiza hosi missão de Revisão ROM (Results Oriented Monitoring / monitorização com base nos resultados) ba projeto “Reflorestação de Dare” hosi loron 14 – 22 setembro, 2021. Tuir agenda Revisão ROM nian, interlocutor hosi MTCI sei hola parte iha entrevista remota (Online) nebé sei conduz hosi perito Eduardo Limbert iha loron Segunda-feira, 20 setembro, 2021, tuku 16h30 – 18h30 OTL.

Sorumutu ho duração minuto tolunulu resin rua nia laran ne’e, remata ho entrega recordação produto Dare nian mak hanesan Café Robusta no Cravinho hosi Presidente FSP, Pe. Augusto ba Chefe de Gabinete MTCI, Sr. Maeni Calado. (Hosi: Rogaia Castro).