Tinan ida ne’e nu’udar Tinan datoluk implementação Projeto Reflorestação de Dare iha Suco Dare. Projeto ida ne’e rasik hetan apoio fundos hosi doador União Europeia iha Timor Leste. Período implementação hosi projeto ida ne’e rasik lorin fulan 36 (tolunulu) resin ne’e. Nune’e, sei falta fulan haat loron ualu, atividade implementação hosi projeto ida ne’e sei to’o duni ba ninia nínin no rohan. Experiência lubuk ida mak implementador sira hosi projeto ida ne’e, Fundação São Paulo no ONG RAEBIA Timor Leste hakúr ona hamutuk ho grupo beneficiário sira hosi suco Dare desde tinan 2019 to’o mai ne’e. Hahu hosi fase socialização projeto, instituição ba grupo agricultor sira hosi aldeia ida-idak (Lemorana, Casnafar, Lelaus, Coulau I, Coalau II, Fila Beba Tua, Nahaek, Fatunaba, Bauloc no Suca Lau), to’o mai fase formação ba agricultor sira liu hosi atividade Eco-farm no reflorestação, formação ba foinsa’e 38 (tolunulu resin ualu) iha área Turismo no Hospitalidade, replicação ba técnica agrícola sustentável iha agricultor ida-idak ninia toos, etc.
Objetivo hosi Revisão ROM (Result Oriented Monitoring / monitorização com base nos resultados)
Durante período implementação projeto Reflrorestação de Dare, atividade hirak nebé implementa ona ha âmbito projeto ida ne’e, sei la husik la’o liu le’et de’it. Nune’e, iha nafatin momento ruma hodi hetan avaliação hosi “osan nain” ou seja doador União Europeia ba atividade hirak nebé mak descreve ona iha proposta inicial. Nune’e, atu hatene qualidade no resultado hosi intervenção projeto ida ne’e, doador União Europeia iha Timor Leste celebra contrato ho Consultor Internacional hodi implementa missão de Revisão ROM (Results Oriented Monitoring/monitorização com base nos resultados) ba projeto “Reflorestação de Dare” (CSO-LA/2018/403006). Objetivo hosi missão de Revisão ROM mak atu forneçe parecer externo ida konaba implementação projeto, liu hosi sira nia aconselhamento no recomendação sira, hodi fo apoio ba gestão projeto nian ba serviço Comissão Europeia, nomos, organização implementadora sira. Iha contexto ida ne’e, equipa Revisão ROM sei avalia situação projeto ida nian, liu hosi halo análiza ba documentação projeto nian, nomos, halo entrevista ho parte tomak nebé mak envolvida, inclui mos beneficiário sira. Revisão ROM halo análiza ba progresso atividade projeto nian, liu hosi fornecimento inputs, atividade concluida, no, resultado alcançado (outputs, direct outcomes). Aspecto/critério hirak nebe mak sei examina durante missão de Revisão ROM nian mak hanesan tuir mai ne’e: Relevância, coordenação, complementaridade, valor acrescentado hosi União Europeia, lógica de intervenção, monitorização no aprendizagem, eficiência, eficácia, sustentabilidade, questões transversais (gênero, direitos humanos, ambiente, alterações climáticas) no ikus liu,Comunicação no Visibilidade.
Perito no interloculor hosi Revisão ROM
Missão ida ne’e hala’o hosi especialista ROM, Sr. Eduardo Limbert, no, hetan mos apoio hosi especialista residente iha Timor Leste, Sr. Leovogildo Belarmino. Missão de Revisão ROM realiza hosi loron 14 to’o 22 Setembro, 2021. Mecanismo ba realização hosi Revisão ROM mak halo entrevista remota/online ho Impelementador projeto sira, Fundação São Paulo, ONG RAEBIA Timor Leste, reunião remota ho Operation Manager in charge, Dona Dulce E. Silva Gusmão, interlocutor sira hosi Ministério dou Turismo, Negócio e Indústria, interlocutor sira hosi Ministério da Agricultura e Pescas, stakeholder hosi projeto ida ne’e mak hanesan Permakultura Timor Leste (PERMATIL), East Timor Development Agency (ETDA), no PROEMA, no mos entrevista direta ho representante grupo agricultor sira iha Dare, Diretor Centro Retiro de Dare no Chefe Suco de Dare, Sr. Gil de Araújo.
Visita Local
Liu tiha fase entrevista direta ho grupo alvo sira hosi projeto ida ne’e iha Tersa-feira ne’e (21/09/2021), perito Sr. Leovolgildo Belarmino, acompanha hosi Coordenador Projeto, Pe. Augusto C. Martins ho Facilitador Projeto ONG RAEBIA TL, Sr. Luciano dos Santos, hamutuk ho membro grupo sira hakat ba visita Demo Plot, área viveiro no fatin poda café,no mos fatin kuda aioan iha Comando, toos escolar hosi Estudante ESC São Francisco Xavier Dare, no, fatin replicação técnica agrícola hosi Dona Manuela iha aldeia Suca Lau. Objetivo hosi visita local ida ne’e hosi avalia direita resultado hosi projeto ida ne’e tuir relatório narrativo no financeiro Ano 2 nebé mak Fundação São Paulo submete ona ba Delegação União Europeia.
Entrevista remota final
Atividade Revisão ROM remata ho entrevista remota final via ZOOM Online hosi tuku 16h30 – 16h50 OTL entre perito Sr. Eduardo Limbert hamutuk Coordenador Projeto, Pe. Augusto C. Martins no Consultor ba EU Grant Procedures, Sr. Fernando Soares, hodi apresenta kona ba resultado avaliação geral hosi missão de Revisão ROM ba projeto Reflorestação de Dare, nebé mak realiza ona desde dia 14-22 setembro, 2021. Liu hosi reunião remota final ida ne’e, especialista ROM, Sr. Eduardo Limbert hakarak hato’o obrigado wain ba interlocutor hot-hotu nebé mak ho laran luak hakarak participa ona iha entrevista ida ne’e, no, fo ona testemunha lolós kona ba projeto Reflorestação de Dare. (Hosi: Rogaia Castro).
