Uma Kreda Católica liu hosi Arquidiocese Metropolitana de Díli iha Timor Leste, marca tan história foun ida ba formação humana liu hosi futura Universidade Católica Timorense (UCT) – São João Paulo II. Ohin, Sexta-feira, loron 16 Julho 2021, iha tuku 09h00 OTL, Arcebispo Dom Virgílio do Carmo da Silva, SDB hamutuk ho equipa Comissão Instaladora UCT no Presidente Conselho Administrativo Fundação São Paulo Diocese de Díli (FSPDD) hakat ba iha Direção do Ensino Superior, Ciência e Cultura do Ministério da Educação hodi submete proposta ba abertura Universidade Católica Timorense (UCT)-São João Paulo II tuir padrão licenciamento institucional hosi  Direção Nacional do Ensino Superior, Ciência e Cultura-Ministério da Educação. Molok atu hahu cerimónia entregue proposta ida ne’e, Arcebispo Díli, Dom Virgílio do Carmo da Silva, SDB nu’udar Magna Sancheler ba Universidade Católica Timorense (UCT) halo uluk sorumutu badak ida ho Sua Excia. Dr. Longuinhos dos Santos, Ministro do Ensino Superior, Ciência e Cultura, acompanha hosi Sua Exa, Secretário de Estado Arte e Cultura, Teófilo Caldas, hodi apresenta kona ba objetivo principal hosi presença equipa Comissão Instaladora UCT nian iha fatin refere.

              Liu tiha sorumutu ho Ministro do Ensino Superior, Ciência ho Cultura, Arcebispo Dili hakat kedas ba salão encontro direção ensino superior nian hodi hahu cerimónia entregue documento. Iha discurso badak hosi Diretora Geral do Ensino Superior, Ciência e Cultura, dehan: “agredece wain tamba Amu Arcebispo rasik, ho amu sira hamutuk ho equipa tomak hakat direta mai iha ami nia direção. Com certeza, ami simu documento hirak ne’e hodi estuda no avalia durante fulan tolu to’o fulan nén nia laran, hafoin mak sei halo fali vistória ba fatin universidade nian.” Nia hatutan tan dehan: “cerimónia entrega documento proposta hodi loke Universidade Católica Timorense (UCT) marca história foun ida iha Timor Leste, iha nebé tuir padrão caderneta nian, husu uluk licença operacional, hafoin mak loke processo aprendizagem iha universidade. Ida ne’e, nu’udar exemplo dahuluk iha Timor Leste, atu nune’e, iha tempo oin mai, entidade hirak nebé hakarak loke universidade, tenki banati tuir precesso ida ne’e.”

Iha sorin seluk, Vigário Episcopal para Assuntos da Educação, Pe. Guilhermino da Silva haktuir katak: “Ohin ami mai submete deit ami nia plano no proposta sira, hodi halo leitura no avaliação ba documento sira, se karik iha ponto balu nebé mak seidauk completo, ami equipa tomak ho laran nakloke simu recomendação sira hodi halo completo documento sira tuir padrão caderneta hosi direção ensino superior nian.” Entertanto, iha loron 19 Março, 2021, iha Festa Solenidade São José nian, Arcebispo Díli submete ona Carta requerimento hodi halo processo ba abertura UCT. No ohin, 16 Julho, 2021 iha memória Nossa Senhora do Carmo nian, Magna Sancheler hosi UCT submete tan documento proposta abertura UCT.

Documento hirak nebé mak submete mak hanesan: Projeto Pedagógicos hosi Curso sira iha UCT, documento legalidade hosi Fundação São Paulo Diocese Dili, Estatuto UCT, Propreidade: uma no rai, documento capacidade financeira/bank statament UCT nian, etc.

Tuir plano nebé mak iha, universidade ida ne’e sei loke faculdade 4 (haat) mak hanesan: 1). Faculdade da Educação, Língua e Arte, iha nebé inclui escolas/departamento sira mak hanesan: Instituto das Ciências Religioas, Escola da Educação, Escola de Línguas no Escola de Arte (Música). 2). Faculdade das Ciências Humanas, fahe ba escolas/departamento sira mak hanesan: Escola de Direito, Escola de Serviços e Comunicação Sociais no Business School. 3). Faculdade das Ciências Médicas, fahe ba escolas/departamento: Escola de Medicina no Escola de Enfermagem e Farmácia. 4). Faculdade da Engaenharia Agrícola, fahe ba escola/departamento: Escola de Agrotecnologia e Agropecuária, Escola de Agroecologia e Agronegócio. Sistema curriculum nebé mak UCT atu adopta mak European Credit Transfer System (ECTS). Fatin, eh, campus UCT nian mak iha Balide (eis edifício SANYOS) nebé mak hetan ona reabilitação desde tinan 2013 liu ba.

Cerimónia ida ne’e hetan mos participação hosi membro estrutura Direção Ensino Superior, Ciência e Cultura, no mos, Dr. Edmundo Viegas, Diretor Executivo da Agência Nacional para a Avaliação e Acreditação Académica (ANAAA).  (Hosi: Rogaia Castro).